الاثنين، 23 مايو 2011

من الأخر كدة ايه موضوع ظباط 9 ابريل

استحملوني لاني فعلا مخنوقة علي الاخر....اول ما دخلت التوتير لقيت خبر ان الظباط اللي نزلت معانا اخدت 10 سنين سجن ،وبعد ما اتاكدت منه حبيت اكلم في كام حاجة كدة.
ذنب الظباط دول في رقابتنا كلنا وان شاء الله هنخرجهم، وذنبهم كمان في رقبة كل واحد خونهم وباعهم.
وانا اول واحدة بلوم نفسي لاني مقدرتش اعملهم حاجة، كل اللي عملته اني اعدت ادعلهم وربنا  مش هيخذلهم ابدا.
اولا الناس اللي بتقول دول غلطوا وده قانون عسكري.......مااااااشي امشي معاكم في الموضوع ده شوية
بقي  ظباط الداخلية القتلة ما اتحكموش  محاكمة عسكرية والظباط اللي نزلت التحرير  في كام اسبوع اخدوا 10 سنين قانون ايه ده وعدل ايه ده.
 يجي واحد يقول ظباط الداخلية  دول مدنين ماشي مدنين يا سيدي  بس ممكن  ظابط الشرطة ده يتعملوا محاكمة عسكرية زيه  زي اي حد الجيش بيقبض عليه او زي ما عمل في الثوار.
ثانيا الناس اللي بتقول ليه ينزلوا اصلا ما يتظهروا في ثكانتهم
يعني بالعقل كدة لو اتظهروا وفرضا ان محصلهمش حاجة حد هيعرف بيعملوا ايه، هما عايزين يوصللنا رسالة، الرسالة عمرها ما هتوصل غير لما ينزلوا معانا وبعدين ليه احنا بنقيس بمكيالين ما شومان سلم سلاحه قبل ما مبارك يتنحي.


ثالثا الناس اللي بتقول هما جايين يتحاموا في المدنين وليه منزلوش بلبس عادي
طيب اديني عقلك لو واحد لبس مدني هتعرف منين انه ظابط جيش وهو ماشي وسط مظاهرة مليونية وبعدين  اللبس الميري تأثيرة أقوي بكتير وبيدي رسالة  واضحة وصريحة  للناس اللي بتفهم.
مين قال اصلا انهم بيتحاموا في الناس  طيب تعالوا نتخيل كدة شوية؟؟؟؟؟؟؟
الظباط ديه نزلت وعرفة انها ممكن مترجعش عارفة انهم ممكن يتقتلوا او يتعدموا عشان مجرد  انهم نزلوا التحرير في يوم، ضحوا بمستقبلهم وبعائلتهم عشان حاجة واحدة ايه هي بلدهم، الظباط ديه اقسمت قسم انها تحمي مصر وشعب مصر مش تحمي اشخاص ولا كراسي ،عارفين نزلوا ليه نزلوا يبرئوا نفسهم،  لانهم شافوا  صورة الجيش ككل ابتدأت تتهز عند الشعب او يمكن شافوا تواطئ المجلس والتفافه علي الثورة.
ديه رسالة شفتها من واحد منهم علي الفيس ردا علي مقال بلال قبل ما ينزلوا بساعات.

عزيزي بلال:
الم يرد الى ذهنك ان يكون الغرض من ظهور تلك الفيديوهات ، في هذا التوقيت بالذات ، و في نفس الوقت هو إيصال تلك الصورة عن من يريدون التطهير للمؤسسة العسكرية ؟
ظهر اثنان من الضباط السابقين ، وكل منهم له موقف لاادعي براءته إزاء تقاليد و قوانين القوات المسلحة ، تحدثوا بسطحية و عصبية و عدم موضوعية ادت الى رد فعل واحد من جميع من شاههدهم ، وهو ...الإستنفار
اذا كانت حميتك لتطهير البلاد من من سرقوا اموالا يمكن كسب غيرها ، او استولوا على اراض يسهل ارجاعها ، فأين حميتك حين تعلم انه هناك من يعبث في درعك الواقي ؟ و ان هناك من استحدث من الطرق و الاليات على مدار السنين ما يمكنه من تدمير جيشك ؟ 
نحن لسنا دعاة عصيان او انقلاب او تمرد ، نحن صرخة تحذير و إعلام بما كان يدور في مؤسسة لم يكن لأي منكم اي اطلاع (او السماح بإطلاع) على مايدور فيها 
إذا كان مجرد تساؤلك عن (اظرف الولاء) ، فهي حقيقة واقعة ، واسأل فيها اي ضابط بالخدمة.
اما عن استغرابك بإنضمام هولاء القادة الى الثوار على الرغم من تلك الأظرف ، فذلك لا لشئ الا لتأكدهم من رفضنا لأي جانب اخر ، و عصياننا لأي امر اخر غير ذلك. مما كان سيهدد بإنهيار البلاد
الا يثير عندك الريب وجود طنطاوي على رأس هذه المؤسسة المحورية 20 عاما في ظل نظام ما اقترب منه احد في اي منصب الا وتلوثت يداه ،إلا من رحم ربي و اثر الفضيلة ؟
الا يثير ريبتك اجتماع اكثر من 3400 ضابط من القوات المسلحة على ما يدعون ؟ 
اخاطبك بالمنطق و العقل المجرد من اي انحياز ، لأن المركب و المصير واحد
اننا لانعلن العصيان ، ولا التمرد او الإنشقاق ، فكل منا لازم لموقعه ، ومن واتته الفرصة للذهاب الى الميدان لإيصال صرختنا ، سيفعل. و ارجو منك النظر بحيادية و لا شئ اخر. وشكرا
 _________________________________________________________
وده اغنية لظابط اسمه  محمد وديع اتسجن بسببها وبعدما طلع ،نزل التحرير ودلوقت اتسجن تاني ( ياريت تسمعوا  كلامها مناسبة جدا للموقف اللي احنا فيه)
http://www.youtube.com/watch?v=N4M7eKoD2bs


 ممكن نعد ما نفسنا شوية ونسائل المفروض نعمل ايه دلوقتي ؟؟؟؟ هل هنسبهم يأخدوا 10 سنين ونسكت مش كدة يبقي بنخون مبادئ الثورة اللي احنا عملنها ( عيش، حرية،كرامة انسانية مش الشعار ده ينطبق علي أي مصري مهما اختلفت مهنته) وياريت نلاقي اجابة قبل يوم الجمعة.
 واخيرا ممكن اقول ان الظباط دول متهوريين اه الخطة كانت لازم تبقي مختلفة اتفق معاكم،  لكن شجعان جدا ومحدش يقدر ينكرده، لان وضعهم ممكن يكون اصعب من وضع شومان.

اللهم بلغت اللهم فشهد





الأحد، 22 مايو 2011

جملة انتم مع الثورة


 الجملة المشهورة هل المجلس مع الثورة ام لا والإجابة لما نشغل عقلنا ونعد مع نفسنا شوية ومنديش الاعذار اللي مش مبنية علي منطق بل عاطفة مصرية خالصة (  قد تخدع بعض الناس لبعض الوقت ولكنك لن تستطيع ان تخدع كل الناس كل الوقت.)
قررتم اليوم 12 فبراير انكم هتحموا الثورة واخدتوها من الشباب في  التحرير ووعدتم انكم  هتحافظوا  عليها  واكدتم ان الطلبات كلها هتتنفذ والحياة هتبقي بمبي  بعد ما كانت سودة ويا سلام بقي علي التحية العسكرية للشهداء اللي الفنجري عملها ،مصر كلها كان قلبها بيطنط من الفرح.... ( جيشنا بقي وفخورين بيه مع ان من كام يوم قبليها فيه ثغرة اتفتحت بين الدبابات -يوم معركة الجمل-  ما علينا سبنا بقي من الماضي وخلينا نشوف هنعمل ايه في الثورة)...........عدت ايام واسابيع وشهور والوضع ولا كأن مبارك اعد علي الكرسي ومسابش الحكم.
ثم جاه اليوم اللي نعد مع بعض بقي خلاص كدة فاض الكيل  ونشوف جملة  انتم مع الثورة عملت ايه احنا بقلنا اكتر من تلات شهور يعني ملكمش حجة خااااااااااالص يا مجلس.

  • المجلس قرر كدة مع نفسه يعمل استفتاء عجيب اوي اوي عشان يعمل الدستور المؤقت اما بنوده فهي مش معروفة ....   بدات التساؤلات، هو كدة الدستور القديم هيسقط ولا لأ، طب المجلس في الدستور القديم وضعه  مش قانوني، وفضلت الناس تضرب اخماس في اسداس. ...         لا بقي انتم هتخوتوا دماغنا ليه ده كان رد فعل المجلس الغير مباشر علي الناس اللي بتسائله باستمرار .                                                                                         جاه اليوم بقي بتاع الصوابع البمبي بس خسايرة كانت كبيرة ان الناس انقسمت لمؤيد ومعارض  ( ولو احنا عايزين صوابعنا تبقي بمبي ديه اول تجربه لينا، الله بقي احنا عايزين نفرح والاختلاف لا يفسد للود قضية)....وبعديه بكام اسبوع طلع دستور تاني خالص ولا كاننا عملنا استفتاء والمجلس بقي  هو اللي بيشرع ويسن ويحاسب ويعمل موازنة طب ازاي انا الرقيب وفي نفس الوقت انا اللي بنفذ وبعمل القوانين(ماعلينا احنا بنحب جشنا ومش مهم كلها كام شهر ومجلس الشعب جي خلاص بقي والدستور الجديد هيتعمل.)

  • معركة الجمل بقي ديه حكاية جميلة انا مش هتكلم في التفاصيل لأن كلنا عرفنها ، العالم كله تقريبا اشترك فيها وبيتحقق معاه وكل اللي بيتحقق معاه بيطلع ( عايشة، ابراهيم كامل) ولا كان فيه حاجة، امال مين اللي عملها مين الرأس الكبيرة يا مجلس؟؟
    طب بلاش ديه الظباط اللي قتلوا لسة في الخدمة ...ايه يبقي فيه حاجة غلط ،ازاي يعني يبقوا في الخدمة وهما متهمين ...بلاش ديه بقي قضية خالد سعيد اللي قامت الثورة بسببها لسة ما اتحكمش  علي المجرمين بالاعدام ؟؟طب ازاي بقي هنطلب للظباط الجدد انهم يتحكم عليهم والقضايا القديمة لسة بتتأجل.
    صحيح إلا فين تقرير لجنة تقصي الحقائق هو اتحط في الدرج ولا أيه اصل كان فيه شوية قناصة كدة وتقريبا اختفوا.
     
  •  نكلم علي 3 من الدروع الاساسية: بقي السباعي هو اللي يشرح جثث الشهدا ؟؟؟السباعي بتاع اللفافة طب تفتكروا هيعمل التقرير ازاي .....فضلنا  نهاتي علي السباعي لغاية لما اتفضح في برنامج اخر كلام فاتشال وجاه النائب ( وفرحت الناس اخيرا مشي اخدنا بثأرك يا خالد) بقي حد يفرح انه اتشال وجاه النائب بتاعه، الراجل عارف السباعي كويس ومشترك في بلاويه وبيمضي معاه في التقارير المضروبة كمان  ....ايوه انت فهمت صح ده تغير وشوش بس...(ده دراع الطب الشرعي).
    النائب العام هو الراجل ده لسة موجود،  محدش ينسي قضية العبارة و تصديرالغاز لاسرائيل والحرس الجامعي وغيرها كتتتتتتتتتير، ابسط دليل انه لازم يتشال ان مبارك عينه طب ازاي هو هيحاكم ال مبارك بقي.   (وده دراع القضاء)
    الملط رئيس جهاز المركزي للمحاسبات اتعملت مظاهرات ضد الملط من عمال الجهاز عشان الراجل ده فاسد  وتقاريره  مش مظبوطة ،واتسلمت الادلة للنائب وطنش خالص، وبعد المظاهرات اللي بتطالب باقالته طلع شرف علي برنامج توك شو يقوله انت التاج اللي علي رؤوسنا!!!!!!!!!!!!!! علي فكرة من ضمن فساد الملط انه اخفي تقارير القمح المسرطن والصناديق السرية.( ده دراع الورق والمستندات)
    نفهم من كدة ايه اننا اكيد مش هنشوف محاكمات عادلة لا جنائية ولا مالية.
    نجي بقي علي التقيل  قبضوا علي مبارك وجمي وعلاء والثلاثي  ومرتضي الحمد لله كدة بقي النظام سقط ( الناس كانت فرحتها فرحة بجد ملهاش زي، واحنا بقي اول بلد عربي تحاكم الرئيس)وابتدا المسلسل البايخ بتاع 15 كل ما تخلص وحدة يطلع واحدة تانية 15 (مش مشكلة عشان الادلة وورق جديد بيظهر ، انتم مستعجلين علي ايه الصبر ياقوم)                       ادينا صبرنا ايه اللي حصل، مبارك اعد يدلع في شرم ( كل شوية خبر شكل هينقله، لا اصلوا تعبان ومنهار ولما صحته استقرت جاه التفسير التاني مستشفي طرة مش هتقدر تستقبل حلته عشان مش مجهزة) ...اما ماما سوزي بقي فديه لوحدها حكاية  ومعاها اسرار لناس عشان كدة طلعت منغير 15 واحدة ،وسرور افرج عنه من الكسب ،زكريا طلع منها ودخل تاني -عشان شافوا الشعب هينفجر من صدمة خروجه هو وسوزي- ولا كأنها لوكاندة،  صحيح إلا ايه سر كل بقاء رمز النظام كلهم في برتوا طرة!!!
  •   ظهرنا بقي في الصورة حاجة جديدة اسمها المحاكمات العسكرية للثوار....ايه ده هو الثوار اللي علموا الثورة بيتحكموا ،تصدق ده اللي بيحصل وفيه منهم اخد 3 و5 سنين غير اللي اخد حكم مع ايقاف التنفيذ يعني هيفضل في سجله ،اما المجلس فطلع بيان في فبراير وقال ديه اشاعات عشان يحصل فتنة بين الشعب والجيش وبعديها بكام شهر قاله هنعيد النظر في الاحكام، الله هو كده مش بيكدبه!!
  • ديه النقطة الأخيرة اللي حبيت اختم بيها ظباط الجيش بتوع 9 ابريل ( دول نزلوا لما الناس ابتدت تشكك في المجلس لأنهم حاسوا ان من واجبهم انهم ينضموا مع الثورة وانهم اقسموا بحماية مصر وشعب مصر زي ما عمل شومان  وغيره ،وبلاش المبررات الخيبة بتاعت الناس اياها)....في اول الاسبوع ده طلع  2 فيديو من ظباط متقاعدين واتهموا المجلس اتهامات صريحة بخيانة الثورة  ودعوا لنزول الجيش يوم الجمعة وانضمامه للثورة بشكل معلن مع الشباب في التحرير، ومع الوقت بدات حملة التشويه دول ناس كذا وكذا وخرجوا من الخدمة عشان كذا ، بعد يومين كدة كتبت الاهرام فيه ناس هتطلع لابسة لبس جيش وهتبقي مندسة وحظرت القناة الاولي برده....الله ما هو المجلس عارف ان فيه ناس هتندس اليوم ده وان دول علي كلام الاعلام مش جيش اصلا ، طيب ايه اللي مفترض يحصل  مش لازم يتأمن المكان، صح الكلام!!!!!!!!        امال طول اليوم مكنش فيه حد علي مداخل التحرير من الجيش؟؟؟هي بس هليكوبتر عمالة تروح وتيجي طول اليوم، واعتصمت الناس مع الظباط عشان اسقاط المجلس لانهم ابتدوا يفهموا الحقيقة وحصلت المصيبة ومعركة 9 ابريل ضرب رصاص حي وقتلة وجري في الشوارع ولا كأننا في حرب.
    انتهي اليوم بنجاح والقبض علي الظباط واخفاء معالم المعركة ، كل اللي حصل بعديها ان المجلس طلع بيان يقول ان السبب في اللي حصل ابو الليل  علي الرغم من  شهادات الناس ان  الراجل كويس،طب عايزين نعرف كام شهيد غير علي ماهر ( مافيش اجابة اصلا غير ان القوات المسلحة مكنتش مسلحة علي راي احد قيادات الجيش) كل اللي اتعمل في الموضوع ده حاجتين محاكمات للظباط عمالة تتأجل واهاليهم هيموتوا عليهم ومش عارفين يعملوا ايه ولجنة تقصي الحقائق اللي شكل تقررها حصل اخوه بتاع معركة الجمل وراح الدرج.
    طيب بعد كل الكلام ده نيجي بقي للإجابه ازاي المجلس يبقي مع الثورة وهو بيعمل كدة؟؟؟ 
    الشعب يريد اسقاط النظام ده شعارنا وده هيفضل شعرنا يوم 27.